காமெடி கலந்த குணசித்ர வேடங்களில் ஜொலிக்கும் கருணாகரன்

காமெடியும், குணசித்ரமும் இணைந்து நடிக்க ஒரு சில நடிகர்களால்தான் முடியும். அந்த காலத்தில் என்.எஸ்.கிருஷ்ணன், எம்.ஆர்.ராதா, பிற்காலத்தில் நாகேஷ் அந்த வரிசையில் தற்போது வேகமாக வளர்ந்து கொண்டிருப்பவர் கருணாகரன். பல காமெடி நடிகர்கள் களத்தில் இருந்தாலும் தனித்துவமான பாணியில் நடித்து வருகிறவர் கருணாகரன். இந்த ஆண்டு மட்டும் அவர் 7 படங்களில் நடித்துள்ளார்.

இவற்றில் குறிப்பாக மெய்யழகன், மிஸ் யூ, சூதுகவ்வும் படங்களில் அவரது நடிப்பு பலராலும் பாரட்டப்பட்டு வருகிறது. ‘மெய்யழகன்’ படத்தில் பஸ் கண்டக்டராக நடித்து கவனம் ஈர்த்தார், ‘மிஸ் யூ’ படத்தில் இரண்டாவது நாயகனாக நடித்தார். நாயகன் சித்தார்த்துக்கு புதிய வாழ்க்கை அமைத்து கொடுத்து அவருக்கு வழிகாட்டும் நண்பராக நடித்திருந்தார். சூது கவ்வும் முதல் பாகத்தில் விஜய்சேதுபதியின் கேங்கில் இருந்த அவர் இரண்டாவது பாகத்தில் நிதி அமைச்சராக இன்னொரு முகம் காட்டி நடித்திருந்தார். இந்த படங்கள் அனைத்தும கருணாகரனின் நடிப்பு வளர்ச்சியை காட்டுகிறது.

கருணாகரன் நடித்துள்ள ‘திரு.மாணிக்கம்’ அடுத்து வெளிவர உள்ளது. சூரியாவின் 44வது படத்தில் முக்கியமான கேரக்டரில் நடிக்கிறார். இதுதவிர 7 படங்கள் வரை கையில் வைத்திருக்கிறார். காமெடி நடிகர்கள் ஹீரோவாகும் இந்த காலத்தில் கருணாகரனும் அசைக்க முடியாத ஒரு ஹீரோவாக வளர வாய்ப்பிருப்பதாக சினிமா பார்வையாளர்கள் கணிக்கிறார்கள்.